ئاتنىڭ تۈگىدىن ئۆگىنىشى

ئۇيغۇر خەلق مەسەللىرى بىر ئات خوجايىننىڭ تۆگىنى >چۆل كېمىسى< دەپ ماختىغىنىنى ئاڭلاپ: >نېمە ئۈچۈن مەنمۇ تۆگىدىن ئۆگىنىپ، خوجايىنىمنىڭ ماختىشىغا ئېرىشمەيمەن؟ دەپ ئويلاپتۇ. شۇنىڭ بىلەن ئات ئېغىلدىن غىپپىدە چىقىپتۇ - دە، تۆگىنىڭ قېشىغا بېرىپتۇ. ئات تۆگىنىڭ دۈمبىسىنىڭ ئېگىز، پۇتىنىڭ چوڭ، بوينىنىڭ ئۇزۇن ئىكەنلىكىنى كۆرۈپ: بوينۇمنى ئۇزارتىشقا بولمايدىكەن، ئۇنىڭدىن كۆرە تۈگۈلۈپ تۇرۇپ دۈمبەمنى چىقارسام، پۇتۇمغا ئاياغ كىيسەم مەنمۇ >چۆل كېمىسى< بولىدىكەنمەن ئەمەسمۇ. دېگەنلەرنى كۆڭلىدىن ئۆتكۈزۈپتۇ. ئەتىسى ئات تازا تۈگۈلۈپ دۈمبسىنى چىقىرىپ، پۇتىغا ئاياغ كىيىپ، خوجايىننىڭ ئالدىغا بېرىپ ئۇنىڭ ماختىشىنى كۈتۈپ تۇرۇپتۇ. كىم بىلسۇن، خوجايىن ئاتنى تونۇمايلا قالماستىن، بەلكى: >قەيەردىن كېلىپ قالغان غەلىتە مەخلۇق بۇ؟< دەپ قىزىقسىنىپ قاراپتۇ. - خوجايىن، مېنى تونۇمايۋاتامسىز؟ - دەپتۇ ئات تېرىكىپ. - ئاۋازىڭغا قارىغاندا ئاتقا ئوخشاشتەك قىلىسەن، لېكىن... - ۋاي خوجايىن، مەن ئۆزىڭىزنىڭ ئېتى شۇ، تۆگىدىن ئۆگىنىپ مۇشۇنداق بولدۇم. بۇنى ئاڭلىغان خوجايىن قاقاقلاپ كۈلۈپ كېتىپ: - سەن ئۆزۈڭنىڭ ئارتۇقچىلىقىڭنى جارى قىلدۇرۇشنىڭ ئورنىغا نېمە ئۈچۈن تۆگىنىڭ سىرتقى قىياپىتىدىن ئۆگىنىسەن؟ قارا سېنى، نېمىگە ئوخشىشىپ قالغانسەن! - دەپتۇ. بۇنى ئاڭلىغان ئات قىلمىشىدىن بەكمۇ خىجىل بوپتۇ.