تۇمان
ئۇيغۇر خەلق مەسەللىرى
غەربتىن چىقىۋاتقان شامالغا نارازى بولغان تۇمان:
- مېنى نېمىشقا قوغلايسەن؟ - دەپتۇ.
- سەن مەھەللىنىڭ ئۈستىنى قاپلىۋالساڭ، قوغلىماي، بېشىڭدىن سىيلاپ ئەركىلىتىشىم كېرەكمىدى؟
- قاپلىۋالسام نېمە بوپتۇ؟ مەنمۇ باشقىلارغا ئوخشاش سەيلە قىلىپ كۈن كۆرەي - دە!
- كۈن كۆر، ھېچكىم سېنى كۈن كۆرمىسۇن دېمەيدۇ، بىراق باشقىلارنىڭ كۈن كۆرۈشىگە توسالغۇلۇق قىلمىغىن.
ئۆزۈملا دەپ يۈرگەن ھەر قانداق بەندە،
باشقىلار بەختىگە بۇلار كۈشەندە.