جاۋابخور قىز ۋە پەملىك دادا

ئۇيغۇر خەلق چۆچەكلىرى بۇرۇنقى زاماندا سايىم ئىسىملىك بىر دېھقاننىڭ گۈلھەسەل ئىسىملىك بىر قىزى بار ئىكەن. گۈلھەسەل ياتلىق بولغاندىن كېيىن، داۋاملىق يامانلاپ كېلىدىكەن. سايىم: >قىزىم نېمىشقا تولا يامانلاپ كېلىسەن؟< دېسە گۈلھەسەل: >ئۇ مېنى ئۇرىدۇ< دەيدىكەن. بىر كۈنى كۈيئوغلى گۈلھەسەلنىڭ جاۋابخور جاۋىلداقلىقىدىن داتلاپتۇ. سايىم ئىچىدە: >خوتۇن جاۋابخور بولسا، ئەر ئەلۋەتتە ئۇرىدۇ، بىر چارە قىلاي< دەپ، ئۇيان ئويلاپ، بۇيان ئويلاپ ئاخىر ئاجايىپ بىر تەدبىر قىپتۇ. بىر كۈنى سايىم قىزىغا: - بالام مەن ساڭا بىر تۇمار پۈتۈپ قويدۇم، مۇندىن كېيىن ئىرىڭ ئۇراي دەپ قولىنى شۇنداق كۆتۈرگەندە، سەن بۇ تۇمارنى چىشلەپ جىم تۇرۇۋال، ئېرىڭنىڭ قولى بەنت قىلىنىپ سېنى ئۇرالمايدۇ، - دەپتۇ. قىزى خۇشال بولۇپ، ئىرىنىڭ ئۆيىگە كېتىپتۇ. بىر نەچچە ئايغىچە كەلمەپتۇ. بىر كۈنى خۇشال قايتىپ كېلىپ: - ۋاي دادا، ھېلىقى تۇمار راستىنلا خىسلەتلىك تۇمار ئىكەن. ئىككىمىز ۋارقىرىشىپ، بەزىدە ئۇرۇشۇپ كەتسەكمۇ ئۇ ئاچچىقلاپ ئۇراي دەپ كەلگەندە تۇمارنى يانچۇقۇمدىن ئېلىپ چىشلەپ جىم تۇرۇۋالسام، ئۆزىچە ئاچچىقىدىن يېنىپ بوشاپ قالىدۇ، - دەپتۇ. سايىم ئىشلەتكەن پەمىدىن ناھايىتى خۇشال بوپتۇ.