كۇلى بېھىسى

شىنجاڭنىڭ ئۆسۈملۈكلىرى بۇ ئەتىرگۈل ئائىلىسىدىكى كۆپ يىللىق ياغاچ غوللۇق يوپۇرماق تاشلايدىغان چاتقال ياكى كىچىك دەرەخ بولۇپ، يوپۇرمىقى ئۇزۇن، ئېللىپس شەكلىدە، گۈلى سۇس قىزىل، قېنىق قىزىل، ياكى ئاق رەڭلىك، مېۋىسى ئۇزۇن ئېللىپس شەكلىدە، رەڭگى سېرىق، قويۇق پۇراقلىق. دورىغا بۇ ئۆسۈملۈكنىڭ مېۋىسى ئىشلىتىلىدۇ. بۇ ئۆسۈملۈكنىڭ مېۋىسى پىشقاندا يىغىۋېلىپ، ئاپتاپتا قۇرۇتۇپ تەييارلىنىدۇ. دورىغا ھۆل ھالەتتىمۇ ئىشلىتىلىدۇ. شىنجاڭ ئۇيغۇر ئاپتونوم رايونىنىڭ قەشقەر قاتارلىق جايلىرىدا ئۆسىدۇ. ھۆل ئىسسىق. جىگەرنى تىنچلاندۇرۇش، پەينى بوشىتىش، ئاشقازان خىزمىتىنى ياخشىلاش، ھۆللۈكنى قۇرۇتۇش خۇسۇسىيىتىگە ئىگە. ئەھۋالغا قاراپ 6 ~ 12 گرام ئەتراپىدا ئىشلىتىلىدۇ. كۇلى بېھىسى، تەسۋىقوناق، يۇمىلاق زىراۋەندە ۋە لېپەكگۈلنىڭ ھەربىرىدىن مۇۋاپىق مىقداردا ئېلىپ، سۇدا قاينىتىپ ئىچىپ بەرسە، ھەرخىل چىڭقىلىشلارغا مەنپەئەت قىلىدۇ. كۇلى بېھىسى، ئارپىبەدىيان، زۇلفا ۋە خام زەنجىۋىلنىڭ ھەربىرىدىن مۇۋاپىق مىقداردا ئېلىپ، سۇدا قاينىتىپ ئىچىپ بەرسە، ئۆتكۈر خاراكتېرلىك ئاشقازان ياللۇغى، قۇسۇش، ئىچ سۈرۈش ۋە پاچاق مۇسكۇللىرى تارتىشىپ قېلىشقا مەنپەئەت قىلىدۇ. كۇلى بېھىسىنى مۇۋاپىق مىقداردا ئىستېمال قىلىپ بەرسە، ئاشقازان خىزمىتىنى ياخشىلاپ، ھۆللۈكنى قۇرۇتىدۇ.